政情：各界逾百人上門聲討黎智英

示威者向貼有漢奸黎卡通頭像嘅橫額擲雞蛋同蘋果洩憤。

逾三十名自稱係正義聯盟及和平論壇嘅人士，尋日下午三點鐘踩上漢奸黎嘅何文田住所門外抗議，佢哋手持寫上「洗滌明珠、驅逐肥黎」、「賣國求榮、天理不容」、「爛果毒媒、藏污納垢」、「口講民主、實為金主」等紙牌，大叫「聲討漢奸黎智英，肥黎禍港數十載，反華亂港心不改，黑金害港，到處亂闖」。約二十分鐘後，另一批約二十多名自稱係旅遊業從業員嘅人士到場聲援，不滿壹傳媒亂作故仔，手持「停止虛假宣傳」、「停止毒害香港」、「剷除毒傳媒」等標語抗議。

喺同一時間，香港旅行社東主協會、香港旅遊從業員聯會及正義聯盟黨共四十五名成員，到將軍澳壹傳媒大樓外抗議，斥壹傳媒煽動反水貨行動，破壞旅遊業，導致業界損失一百億港元利益。

旅遊業界手持貼有漢奸黎頭像及寫上「漢奸走狗賣國賊」嘅紙牌，喺壹傳媒大樓外示威。

多個團體在漢奸黎住所抗議，聲討漢奸黎禍港及壹傳媒毒害香港。