中環出更：女牙醫撐起半邊天
近年女牙醫愈來愈多，卓妮日前喺香港牙醫學會主辦嘅亞太區牙科會議開幕儀式及晚宴上就發現，該會青年牙醫組當中不乏年輕女成員，好似剛喺港大牙科畢業不久嘅陳紀璇同王蕙霞等都係靚女牙醫。陳紀璇話，依家讀牙科嘅男女學生數量參半，估計未來牙醫男女比例漸趨平衡。
當日晚宴吸引世界各地業界精英出席，牙醫學會會長梁世民更喺同日成為新一屆亞太區牙科組織聯盟會長。梁世民話，今次係香港第四次成為主辦單位，除咗分享業界最新科技及研究外，亦為年輕一輩牙醫提供訓練。
鄭淇德老婆係同窗
講到男女牙醫比例，牙醫鄭淇德就大爆當年讀牙醫，成班學生得幾個女同學，其中一個就係佢太太，但依家就唔同晒，一班起碼有一半係女仔。佢認為呢個現象可能同女性心智較早成熟有關，因為入大學計中學成績，以前男女分開兩條隊計分，依家合併一條隊，而普遍女仔中學成績都好啲，因此女仔入大學率亦高咗。佢笑言長遠女性學歷高過男性都有壞處，就係搵男朋友會難咗囉！
當晚出席嘅仲有兒科醫生陳以誠同眼科醫生周伯展、香港醫療專業人士協會創會主席江明熙、專業及資深行政人員協會會長陳紹雄等。牙醫學會青年牙醫組聯席主席曾憲紀同陳之駿話，牙科每年都有好多新科技及物料推出，但大部分醫生都會觀察一段時間等技術成熟先會沿用，舉例以前睇牙經常要印模，依家就可以用部機照完之後用3D打印技術印出來，但實際運作上仍有優化空間。
卓妮