中環出更：睇錯加國樓市蕭楚基揼心口
夏日炎炎，話咁快今個馬季又剩番幾個賽馬日，日前卓妮喺沙田馬場見到社區參與助更生委員會主席蕭楚基，佢話已計劃好嚟緊馬季抖暑去邊度消遣嘞！佢話打算八月同太太享受二人世界，一齊到英國及歐洲過番個愉快暑假，而太太喺德國嗰邊有親戚，到時都可能會去探吓佢哋。
話說唔少名人於外地都有物業，方便公幹同旅行，蕭楚基話以前佢喺加拿大都有買樓，不過可惜十年前已經賣咗，之後當地樓價卻係咁飆升。同一個單位，佢喺九十年代以三十多萬加拿大元買入，約十年前以四十萬加拿大元賣出，點知依家個單位竟然升到一百六十幾萬加拿大元，揼心口兼大呻加拿大樓價同香港一樣咁高。現時佢兩個仔都喺加拿大，諗住置業等孫仔可以喺加拿大讀書，先發現已經買唔番同一價位嘅樓，早知當年唔賣咁話喎！
王賢誌同爸爸心有靈犀
轉頭見到東華三院副主席王賢誌同佢爸爸王忠桐、康泰旅行社董事長黃士心同太太、女兒黃康莉及女婿Calvin、仁濟醫院副主席嚴徐玉珊同兒子嚴子杰與弟妹一家等。見王賢誌同爸爸一同着住鮮藍色西裝現身，唔通特登襯埋一套父子裝？王賢誌就話平日同爸爸通常分開買衫，亦好少互送衫褲等做禮物，呢日純粹係因為夏天唔想着黑色衫咁熱，所以就揀咗淺色啲嚟着，咁啱又撞正同爸爸同一隻色，雖然風格唔同但都算係心有靈犀喇！
至於甚少與女兒現身嘅黃士心就話呢排兩個仔比較忙，好似呢日咁，一食完晏佢哋就趕住工作，所以變咗由太太同女兒陪佢入馬場喎！
卓妮