政情：時裝教父發功 爭取設辦房
香港紡織業由過去北移再遷到外地設廠後，修讀時裝設計嘅學生已經好難見識打辦真功夫。早前我哋見到香港理工大學紡織及製衣學系教授區偉文（Raymond），佢教書三十幾年，桃李滿天下，一向被稱為香港時裝界「教父」。Raymond感慨話，現時香港連打辦嘅辦房都無，學生唔識打辦不特止，連被打辦師傅頂兩句而學到嘢嘅機會都無。難怪佢苦笑話成日話班學生最叻係「黐膠紙」喎！
畀師傅頂嘴學到嘢
Raymond話，依家學生設計完之後會將設計圖電郵去內地辦房，廿四小時內即有成件樣辦衫寄返嚟香港。學生如果想修改只能用膠紙黐來黐去，完全唔識打辦嘅過程。換轉係以前，學生可以同打辦師傅交流，若唔熟書被師傅頂兩句，都即刻學到嘢喇！Raymond認為，政府應正視呢個問題，最近佢亦聯同設計界一齊「發功」，希望爭取香港有辦房。