政情：李永達做手術都掛住抽水
早前民建聯立法會議員譚耀宗做切除息肉手術同陳恒鑌太太產子事件，被外界質疑兩人喺使用公立醫院服務時濫權打尖，利用議員身份「特事特辦」。民主黨前議員李永達（高達）尋日就喺社交網站自爆做咗白內障手術，更強調自己並非在伊利沙伯醫院、廣華醫院及瑪麗醫院等公立醫院做手術，而係幫襯私家醫院，估唔到高達做手術都要抽水，得閒休養吓好過喇！
自從先後爆出有議員懷疑濫權之後，事件已喺政圈形成恐慌，搞到政界中人個個做完手術都要公開強調自己無濫權。
左眼患白內障
不過，同基層市民爭奪公立醫療資源就話要「申報」啫，點知高達尋日喺社交網站度發貼，話兩個月前檢查眼睛，醫生朋友話佢左眼有白內障，而且「已半熟」，應該做手術，所以透過醫生在一間普通私院做白內障手術，但又補口話唔係喺公立醫院做手術，咁仲唔係抽水？
不過，高達抽水之餘，亦不忘大讚醫生朋友手術高明，短短十五分鐘已完成手術，而且一啲痛都冇，手術傷口今晚就可以拆線，到時視力就會回復正常，就連近視亦會減少。