政情：30人上門聲討漢奸黎現眼報

自稱霸王員工 斥流氓媒體

《壹週刊》遭霸王國際集團控告誹謗並索償案，《壹週刊》上月被判敗訴，約十名身穿黑衣自稱係霸王嘅員工，以及約二十名關注組成員為「霸王員工工會」及「撐霸王集團關注組」人士，到位於將軍澳嘅壹傳媒大樓外抗議，佢哋拉起寫上「流氓傳媒失信於民」、「打倒漢奸黎智英，還我民族企業」、「陸（六）年沉冤終昭雪，討回公道還清白」，及高呼抗議口號，聲勢浩大，似乎積壓莫大嘅冤情。

未幾，壹傳媒派出員工到場，更邊拍攝邊查問：「你哋收錢嚟o架？」有關注組成員隨即斥責：「無良心，竟然話我哋收錢？」期間雙方口角，喺壹傳媒報警求助後，十多名警員到場協助。抗議行動持續咗四十分鐘後，示威者和平散去。

自稱是霸王員工工會的人士在漢奸黎大宅外展示寫上「流氓傳媒失信於民」等三幅橫額以示抗議。

另有「撐霸王集團關注組」示威者拉起寫上「無良壹傳媒 媒體黑社會」及「打倒漢奸黎某某賣國賊」的橫額及抗議標語。

日前「五漢拍門」 唔敢報警

其實早幾日發生錦衣衞「五漢拍門」事件，漢奸黎只係搵咗旗下員工守場，無選擇報警唔知驚乜呢？但尋日就決定報警求助，係咪因為今次證實咗並非強力部門搵上門呢？

及後呢批示威者喺下午三時三十五分，分別乘坐兩部中港七人車或步行到漢奸黎位於嘉道理道嘅大宅，佢哋除咗手持之前抗議嘅橫額外，同時又拉起寫上「打倒漢奸黎某某賣國賊」及「無良壹傳媒　媒體黑社會」嘅橫額，又大叫：「虛假報道！還我血汗錢！還我民族企業！流氓媒體失信於民！」警方曾派員到場了解事件，並向大宅保安及示威者了解事件及登記資料，示威者喺下午四時四十五分左右離去。其中一名到場示威嘅男子，與早幾日到漢奸黎大宅外拍攝嘅其中一名疑似內地男子樣貌相似，問佢有何訴求時，佢未有透露，只自稱係霸王員工。霸王國際集團發言人表示，該集團已得悉事件，而有關行動係部分員工嘅自發行為，暫不作評論。

昔得戚今騰雞 此一時彼一時

老實講，漢奸黎做埋咁多衰嘢，得罪人多，依家可謂新仇舊恨一齊湧出來，究竟係強力部門抑或係仇家搵上門，睇嚟佢都分唔清楚，但呢類好似上門「追數」嘅事件肯定陸續有來。當年漢奸黎拍廣告就話咬住蘋果扮中箭，懶淡定咁款，但時移世易，此一時彼一時，依家佢牙齒印多多，畀仇家追到氣急敗壞，確係周身中箭，仲要咬住個「生蟲爛蘋果」，都係自作孽攞嚟衰！