中環出更：徐炳光思源 暢談師生情
香港中文大學早前舉行廠商會演講廳命名典禮及「廠商會寰宇實習基金」捐款儀式，中華廠商聯合會會長李秀恒（Eddy）同一班副會長都有出席，仲喺致詞時提到自己同中大嘅淵源。原來Eddy十幾年前，曾經喺中大教過十幾堂工商管理，仲好欣賞中大嘅學生夠上進同勤力，記得當時有學生拎到「B+」成績後唔夠滿意，竟然特登向佢尋根究柢希望知道失分原因，令佢印象深刻。
Eddy仲話，依家佢公司都有啲員工係中大畢業生，唔單止關心公司生意，平日都好關心同事。而嚟到中大有感嘅仲有副會長徐炳光，原來中大香港文學研究中心前主任小思（盧瑋鑾）曾經係佢中學時嘅班主任，係對佢影響深遠嘅啟蒙老師。徐炳光依稀記得當年學費三十八元，但由於家境貧困，無法再繼續學業，其時小思老師喺他嘅周記得知此事，竟提出幫佢交學費，但當時老師薪金都只係百多元，好在最後佢成功申請助學金，但老師一番好意令佢非常感動。
楊志雄話去英國抵玩
同場仲有廠商會副會長楊志雄及吳宏斌。吳宏斌當日一落機就趕去活動，原來佢啱啱去完拉斯維加斯出席珠寶展，佢話現時整體市道都麻麻，對美國方面亦唔太樂觀，若英國脫歐更加係影響全球嘅問題，但估計脫歐機會不大。雖然楊志雄有生意喺英國，但當地就無物業，又話英鎊匯率近年相對便宜，去玩同讀書相當抵。
卓妮