中環出更：周永新借麥理浩炮轟港府
港府就退休保障問題（退保）進行嘅公開諮詢經已結束，但港大社會工作及社會行政學系榮休教授周永新仍未鬧夠，尋日又喺電台節目向港府發炮，今次仲連前港督麥理浩都搬埋出嚟，直指香港社會嘅分裂已達臨界點，「資本主義醜惡一面正陸續浮現」，港府仲要喺今次退保諮詢挑起世代之間嘅對立，大家真係要自求多福！
周永新批評，退保諮詢文件內容不盡不實，如同欺騙市民，呢啲佢已經鬧過好多次，而最令佢激動嘅係，港府以融資問題為由反對全民退保，只肯推行有資產限制嘅「有經濟需要」方案。佢提到唔少長者為咗每月攞多一千元長者生活津貼，被迫講大話隱瞞本已不多嘅「棺材本」，若然落實有資產審查嘅退保方案，相信只會令更多長者講大話，加深香港社會嘅誠信危機。
斥退保諮詢挑起世代矛盾
周永新又引用麥理浩喺最後一份施政報告嘅發言，指香港喺麥理浩治下十年內，先後建立咗社會保障網同開始興建公屋，令「資本主義醜惡的一面並沒有出現」，反觀依家香港貧富懸殊嚴重，樓價高企，年輕一代睇唔到前路，資本主義醜惡嘅一面正陸續浮現，仲有身份認同等深層次矛盾動搖緊社會嘅根基，政府仲喺今次退保諮詢挑起世代矛盾，肯定會令香港社會進一步分裂。
卓妮