中環出更:持BNO可參與英脫歐公投

英國脫歐公投在即,原來決定英國去留嘅唔止英國公民,持有英國國民(海外)護照(BNO)嘅香港人亦可以左右大局。香港英籍華人網絡主席李貞駒(Christine)話,BNO持有人雖然冇英國居留權,但就同英國公民一樣享有投票權,實在相當微妙,若有效行使,仲足以成為英國政壇無法忽視嘅力量添。Christine仲呼籲,持有BNO嘅香港人應好好珍惜自己嘅投票權利。

6.15前授權投票

Christine話,距離脫歐公投唔夠三星期,目前支持者同反對者約各佔一半,故此每一票都相當重要。佢就估計現時具資格擁有BNO嘅港人有三百四十萬,加上香港有五萬個居英權家庭可以投票,港人嘅選票係有可能影響脫歐公投結果嘅。而持有有效BNO而又有意參與公投者,就可以喺本月十五日之前透過授權行使投票權喎。佢又話,英國係咪留喺歐盟對港人都有影響,因為英國一旦脫離歐盟就有可能收緊入境限制,甚至影響埋港人喺英國謀生或求學。

英籍華人網絡副主席梁日昌就提醒,近年港人喜歡到英國置業,假若英國脫歐唔止會導致樓價下跌,英鎊亦需加息以維持匯價,屆時物業按揭支出就會大增o架喇。

卓妮

第一手消息請下載on.cc東網iPhone/iPad/Android/Windows Phone Apps