中環出更:霍啟剛拐拐吓 疑患筋膜炎

暑假快將到來,大專學生或部分高中學生都會趁機到各大機構或團體爭取實習機會,香港青聯學生交流網絡尋日率先舉辦「共創系列」暑期實習計劃啟動禮,一班香港青年聯會(青聯)骨幹成員,包括青聯首席參事霍啟剛均有現身支持,現場所見,啟剛唔止曬到黑黑實實,仲瘦咗幾個碼,原來一切係勤力健身同游水嘅成果,前後足足瘦咗廿幾磅!不過,啟剛一行路隻右腳就有少少「一拐一拐」,佢自言一早起身隻腳底就腫咗仲好痛,未知係咪患上筋膜炎,會去睇醫生檢查吓。

據知今年有超過二百名本地大學生參與該系列暑期實習計劃,分別於北京、上海、哈爾濱及廣東實習四或六周時間。講起年輕時實習經歷,全國青聯副主席兼青聯「共創新世界」暑期實習團榮譽主席鄭志剛話,當年試過於銀行實習及於日本京都替學生補習英文,可能對象主要係學生,所以壓力唔太大,其中於銀行工作遇到唔少瑣碎工作,但都學到好多嘢。

青聯副主席吳傑莊憶述,自己當年於廈門實習咗兩、三個月,最難忘係啱啱到埗首數日,有朋友介紹佢食一間街頭麵檔,一行人個個食完都冇出事,只有佢事後屙到入咗醫院,不過佢亦有得着,就係訓練到依家唔會水土不服。

同場現身支持活動仲有副主席蔡德昇、副秘書長何迪夫、柯家洋及陳詠娸等人,其中曾於加拿大讀書嘅何迪夫話,以前搵實習大部分係「義工」冇錢收,仲要親自叩門搵,剪報剪到成手黑晒好平常,佢最記得自己喺會計師樓經常被安排做碎紙工作,基於好多文件都係涉及機密資料內容,因此當時都好認真專注去做好有關工作。

卓妮

第一手消息請下載on.cc東網iPhone/iPad/Android/Windows Phone Apps