政情：施榮懷變網購狂「淘」
依家個個都上網買嘢，零售業受到嘅衝擊唔小。早前我哋見到中華廠商聯合會永遠名譽會長施榮懷（Irons），佢話早幾年香港都有好多網購網站，但現時幾乎消聲匿迹，所以佢都要親身試吓究竟淘寶有咩優點，點知唔試猶自可，一試就變咗常客，依家仲不時幫細佬同朋友買嘢添。
零售難被完全取代
Irons用咗三個月時間摸熟晒淘寶功能，連比較少人用嘅拍照搜尋功能都難佢唔到，話影張相就搵到類似樣貌嘅貨品好方便，笑言以前放假就攬住太太行街，依家就變咗攬住太太淘寶喎！
經常游走中港兩地嘅Irons，由於喺北京有個商場，有時賣家唔寄貨去香港嘅話，佢就可以寄去商場，然後再帶返港，自己做埋集運咁話。雖然佢淘得咁過癮兼認為網購係大趨勢，但佢話有啲零售始終好難被完全取代，好似佢去連鎖店試褲，試啱就會一次買幾條，但舊式連鎖品牌都要諗計轉形象，如果唔係好快會被淘汰。