政情：今日你上鏡：黃雅芝推個性錶拓商機

經濟寒冬仍未有盡頭，業界惟有絞盡腦汁諗新橋。香港鐘表業總會副主席兼九龍表行後人黃雅芝（Angie）最近就諗緊做DIY手錶，開拓鍾意個性化嘅年輕人市場。Angie話，曾經有唔少朋友想結婚或送禮畀伴侶，問佢可否訂造與眾不同嘅對錶，於是激發佢開發度身訂造市場嘅念頭，目標係專攻八百至三千元嘅平價市場。Angie信心十足話，刻上姓名、換錶帶等個性化設計係佢哋嘅強項，事關佢哋維修師傅多，希望藉此打開一條新商機。