政情:卿姐勸黨友咪着穿窿襪

民主黨(白鴿黨)將於下周一到日本考察六日五夜,期間會與日本外交部、國會議員、香港駐日本經貿辦人員等會面,亦會考察當地發展項目。今次日本之行係白鴿黨首個境外考察團,黨主席劉慧卿(卿姐)當然特別上心,更向黨友發出溫馨提示,要求大家着得斯文啲,叮囑咪着穿窿襪,唔通班黨友平時都係咁環保?

帶隊訪日 冇預小背心

卿姐話,日本天氣已開始轉熱,所以提醒黨友帶備輕便又不失斯文嘅裝束出發。天氣炎熱,卿姐嘅小背心會否重見天日呢?佢就笑笑口話只係平日嘅打扮咋。除咗提醒輕裝上陣,卿姐更向黨友千叮萬囑要注意對襪,因為日本嘅餐廳經常要脫鞋內進,萬一對襪穿窿就尷尬喇,果然夠細心。

不過,細心嘅仲有日本駐港總領事松田邦紀,因為卿姐閒談間曾透露,多年前喺福岡嘗過全雞宴同京都嘅豆腐宴都令佢非常難忘,點知幾日後就收到貼心嘅電郵通知,話六日行程中已經安排咗全雞宴同豆腐宴。原來日本人唔止想雞髀打人牙骹軟,仲想豆腐打人牙骹軟喎!

第一手消息請下載on.cc東網iPhone/iPad/Android/Windows Phone Apps