政情:譚耀宗手術打尖 道歉快閃

民建聯前主席、立法會議員譚耀宗被踢爆本周二喺公立醫院「打尖」做切除耳部息肉手術,東窗事發後,外界就質疑佢帶住特權去醫院。譚耀宗尋日於立法會就事件鞠躬道歉,話事件引起多方不便,以及影響到其他人,對此表示歉意。不過,佢不單止冇回應記者提問,就連鞠躬亦都只係身體微微向前傾,誠意欠奉,難怪被千夫所指,有議員更去信立法會議員個人利益監察委員會(議監會),要求調查事件。

前日東網率先報道譚耀宗喺伊利沙伯醫院打尖做手術,譚耀宗尋日終於喺立法會就事件鞠躬致歉,但被記者追問到當日係咪知道自己打尖、究竟有冇利用特權時,佢只係以「無嘢補充」回應,之後極速閃人,整個過程都只係約一分鐘,真係淥個杯麵嘅時間都唔夠。

同袍鬧爆 促立會徹查特權

對於譚耀宗打尖做手術,有泛民主派議員就批評佢「喺醫院就惡晒」。而本身係泌尿科醫生,又曾經喺伊利沙伯醫院工作過嘅議員郭家麒亦質疑,譚耀宗患嘅並非重症,擔任議員多年,冇理由唔知道自己享用緊特權,佢已經去信要求議監會調查事件。

衞生服務界議員李國麟就話,手術名單係由醫生制訂,如果譚耀宗當日根本並非喺名單上,但又突然被列名單首位,就可能係打尖,有需要交代清楚。至於身為議監會副主席嘅劉慧卿表示,議監會主要監察涉及金錢利益、董事、住宅等申報,如果議監會要開會,就一定有足夠時間。

黃以謙:常有貴賓要求打尖

本身係精神科醫生、曾任葵涌醫院老齡精神科門診部及照顧者支援中心主管嘅前九龍城區議員黃以謙,則喺社交網站發貼爆料,其實經常都會有VIP(貴賓)要求打尖,特別係善團總理、區議員、社區領袖等,佢哋以為自己「做咗嘢幫HA(醫院管理局)」,就會有VIP服務,但如果拒絕打尖,又會搞到關係好僵。簡單嚟講,即係拒絕呢啲所謂VIP,分分鐘之後仲麻煩,真係難為咗班醫護人員。

食物及衞生局表明關注事件,醫管局同院方都會嚴肅處理及調查。伊利沙伯醫院已經委任咗三人調查小組,並將於四至六周內完成報告及提出改善建議,報告會呈交醫院管理局。雖然未知有冇醫護人員因事件受到牽連,但肯定嘅係譚耀宗真係累街坊喇!

第一手消息請下載on.cc東網iPhone/iPad/Android/Windows Phone Apps