最近副學士忽然又成為話題，有調查指副學士上流機會低，近七成副學士畢業生月薪唔過萬五元。阿哥，對職場稍為關心的，都知道即使大學畢業生，起薪都係萬多元而已，何況喺僱主心目中，副學士同高中生差不多，你估會有幾高人工呢？
副學士係董建華於二○○○年做特首時推出嘅「傑作」，佢老人家想增加大專學歷人口，然真正憑副學士升讀大學嘅不足十分之一。副學士讀完書冇出路，你話個社會又點會有活力？《說文解字》話：活，本義為流水聲。流水之魅力，在於其活潑、活躍，是以有所謂「活色生香」也，歌仔都有得唱；如今讀完副學士，年輕人感到前路茫茫，怎會感到「向上流」的活蹦？
香港教育制度先天不足，後天失調，完全係外行領導內行，才搞成今日局面！呢，一個制度明明係唔得掂，本應壯士斷臂，免留遺毒；副學士明明出路多局限，政府卻一味資助；過去四年，每年收生超過三萬，結果係不理好醜，只要有腳有手，幾乎阿貓阿狗都可成副學士，難怪副學士數字年年遞增，○五年畢業的自資副學士有三千六百多人，迨至一四年達到一萬三千多人；副學士無助年輕人「向上流」，統計數字老實話畀我哋知：統計處自一二年首季，每季一次，以學歷分組，副學士過去十六個季度調查，有十四次係失業率最高的一組，甚至高於高中畢業，你話靠讀副學士改變一生，倒不如早啲出嚟學紮鐵或洗碗好過！
副學士最終淪為若干院校嘅另類金蛋，從另一角度看，或許算是發展「教育產業」！《詩經》有句：南風之薰兮，可以解吾民之慍兮。百姓有「慍」，執政者須重視，尋到改革的方向，才能有南風之薰；年輕人有慍，執政者一味廢噏大把機會向上流！唉，天堂有位都畀高官預約訂滿喇！