政情：公民講場：員工變羔羊 李國寶「肥仔」

李國寶任董事會主席兼行政總裁、業績表現欠佳嘅東亞銀行大裁員，尋日證實裁減一百八十人，而附屬公司東亞證券有限公司喺下月八日前關閉全部廿二個香港零售網點。咪以為東亞銀行管理層呢個時候會共度時艱，李國寶疑自肥大過天，佢舊年酬金竟然高達二千八百萬元，大批員工就被開刀成為代罪羔羊，多名立法會議員均睇唔過眼鬧爆，其中勞工界議員郭偉強更直接踩上東亞銀行總部請願，狠批東亞銀行大規模裁員，做法涼薄，真係擲地有聲，大快人心。