政情：譚耀宗傳打尖割息肉 伊院徹查

被指當係貴賓 特事特辦

HA Secrets專頁嘅貼子又透露，呢位「最大保皇黨前任大佬」手術前獲安排喺醫生護士休息室等候，手術後就去電腦室休息，「阿DOM（部門運作經理）同高級醫生當佢係貴賓特事特辦，又叫其他人唔好出聲」，令其他護士同醫生敢怒不敢言。

本報記者向譚耀宗查詢最近有冇黨友曾到伊利沙伯醫院（QE）做小手術時，佢最初話唔清楚，其後先承認自己曾到上述醫院做切除耳部息肉手術，因為嗰度嘅日間醫療中心較為安全，又強調手術係「小意思」。至於有冇「打尖」，佢話當時只向院方表示工作繁忙，希望快啲做手術，而太太到醫院係為咗照顧佢，並無自出自入，成個手術為時大約個幾鐘，強調過程由院方安排。佢自己無意打尖，不過一切聽從醫護人員嘅意願。

不過，QE發言人回應，指一名病人喺五月三十一日在該院進行手術，獲個別員工安排經員工通道進入及離開手術室，而有關病人家屬亦獲安排於病人進行手術期間，在員工休息室（並非無菌範圍）等候。嗰名病人屬當日該時段首名接受手術嘅病人。

發言人強調醫院同部門主管並唔知悉事件，公立醫院就病人求診及治療安排有既定程序，以上安排並唔恰當，院方會嚴肅處理同徹查事件。發言人又指出，該名病人屬當日首名接受手術嘅病人，故係咪涉及打尖以及個別員工嘅安排問題都要作出調查。

譚耀宗就喺院方作出回應後發出新聞稿，就事件深感歉意，而知道有關方面正調查事件，佢就不便回應。