政情：莫乃光被轟 賊喊捉賊

IT界較為弔詭之處，係因為呢個界別人士無統一認證，除咗小量公司票外，其他希望有個人票嘅選民，可以透過唔同專業機構認證，但程序及門檻不一，令泛民或建制派都有誘因，透過較容易成為會員嘅組織「冧友」登記成為選民，即係合法「種票」。

門檻唔高 多人登記入會

其中電機電子工程師學會（IEEE）入會程序較簡單，只要求入會人係各大院校嘅電腦或資訊工程畢業生，並繳交九百多元年費就可以入會，所以有三千五百幾名新增選民就係透過該會產生。不過，被指親建制嘅互聯網專業協會（iProA）嘅入會門檻，亦只需若干科技行業工作經驗，所以同樣被指係建制派「冧友」之選。

所以有分析指，在泛民、建制雙方一同「冧友」下，導致選民人數創新高，只係沒料到泛民「冧友」狼過建制派啫，點知莫乃光仲話擔心有種票情況，認真搞笑，難怪有政府中人狠批佢「賊喊捉賊」喇！

稱選民人數升利弊難料

莫乃光表明，佢只是IEEE高級會員，呢個組織並非與泛民友好，他只係鼓勵IT界從業員登記做選民，可以選擇較為容易入會嘅IEEE或電腦學會，又話難以估計選民大增對佢有利定係有弊，只話選民數目大增，操控成分會減少。

莫乃光同其他泛民尋日亦召開記者會，分析多個功能界別嘅形勢，其中法律、衞生服務同教育界選民減少，相信係部分選民轉投俗稱「超級區議會」嘅區議會（二）功能界別所致。至於會計界選民就微升，而建築、測量、都市規劃同園境界選民升幅更達百分之八。