中環出更：星爺撞邪？ 無記者都扑咪
立法會尋日發生「靈異」事件！話說中午一點幾，金融界立法會議員吳亮星（星爺）突然一個人走去立法會會議廳外嘅傳媒「咪兜」位置，攞住字條喃喃自語，奇怪嘅係「咪兜」附近並無記者，亦無電視台嘅攝影師，只有幾部無人操作嘅攝錄機。莫非星爺時運低撞邪，同緊只有佢先見到嘅「媒體」做訪問？
自言自語半分鐘受訪
星爺在「咪兜」自言自語近半分鐘，引起駐守喺立法會走廊嘅記者注意，紛紛上前關心「星爺」。原來有電視台記者致電星爺，「遙控」星爺到「咪兜」評論有關銀行裁員嘅消息，只係咁啱嗰間電視台嘅攝影師未埋位。咁點解攝影師未埋位都拍到呢？其實電視台部攝錄機係長開影住「咪兜」嘅，所以邊個走埋去「咪兜」講嘢都會錄影。
星爺其後以中、英文回應銀行裁員嘅消息，簡單回應咗現場記者提問，然後就好似鬆咗一口氣話︰「去食飯咯！」跟住離開「咪兜」。好彩星爺唔係撞邪，大家只係虛驚一場，否則真係唔知去邊度搵到筷子鉗佢中指呀！
卓妮