中環出更：政府乜都唔做 商界嘆裁員潮殺到
經濟嚴冬持續多時，企業嘅裁員潮終於殺到。卓妮尋日喺一個國際中小企博覽會推介活動上，見到中華出入口商會會長張學修及從事保險及汽車生意嘅香港中小企商會聯席主席羅少雄（Paul），講起有證券業大幅裁減百幾人，Paul直呼「弊啦！弊啦！」事關保險及汽車業如果業績唔好，前線同技術員工就首當其衝。佢話現時業界已開始慢慢裁員，預計可能會陸續裁員大約一成，涉及數以千計打工仔生計。
Paul話，保險業嘅註冊前線員工有八萬人，汽車業則有十萬人，其中維修技工有一萬人咁多，如果裁員幾個百分點，都講緊幾千人，唔怪得之佢呻話大件事喇。張學修就話，今年以嚟，的確有商界朋友面臨裁員壓力，佢認為政府應該諗吓計幫助業界，包括減稅及資金等方面。不過，佢又同業界打氣，認為對未來經濟前景唔使睇得太差。Paul都話，內地經常有優惠政策扶持特定行業，港府唔應該乜都唔做囉！
徐炳光優化廠房自動化生產
同場仲有中華廠商聯合會副會長兼內地事務委員會主席徐炳光（Edward）、廠商會會董鄧錦添及威馬電器董事長蔡龍威等人。做縲絲起家嘅Edward已升級轉型做汽車及航天零部件，佢底氣十足話，旗下香港公司唔會裁員，反而只加不減。
事關Edward早在六年前已喺內地廠房進行自動化生產，逐步將內地員工以自然流失方式由一千三百人縮減至五百人，未來仲要繼續優化自動化。由於成功轉型，於是香港方面一路增聘人手，包括工程師、設計部門及市場推廣等人才，兩年來員工數量已增加百分之五十。其實員工同分店一樣，不斷膨脹及擴充都唔係好事，最後無可避免裁員及閂分店。
卓妮