政情：今日你上鏡：施家殷審視 科大「頂得住」

城市大學冧綠化屋頂事件嚇親好多人，包括建築師兼九龍樂善堂主席施家殷（Kyran），事關Kyran係科技大學校董及校園發展委員會主席，呢個職位正正負責睇住校內所有建築物。難怪Kyran話，事發當日佢即刻全面審視科大嘅綠化天台，睇吓有冇類似城大嘅情況。好彩科大校舍都算新，早喺起樓時已經預咗做天台綠化工程，即綠化天台屬於樓宇結構一部分，亦有同樓宇一齊入則，唔使擔心後加綠化要再計過疏水、負重等變化，因為咁先至令佢鬆一口氣咋！