政情：區詠芷教慳電賺節能回贈
好多人知環境局局長黃錦星同天文台前台長林超英鬥慳電，慳到有點脫離現實，但原來星星下屬靚女政治助理區詠芷（Michelle）都加入慳電行列，而且仲精打細算。Michelle話，市民可能無留意慳電有回贈優惠，中電嘅家居用戶電費單，每兩個月總用電量若少於四百度電，係有八五折節能回扣獎勵；另港燈亦有其他電費回贈優惠。
Michelle話，以一張三百三十八度電嘅電費單為例，連同燃料調整費，原本要交約三百六十元電費，扣除慳電回贈五十二元優惠後，只需付三百零八元，大家得閒留意吓呢個慳電優惠貼士喇！
講開環保節約，環境局創造嘅「大嘥鬼」已變成Icon，唔經唔覺已經三歲喇，六月五日會在添馬公園搞個派對，屆時市民可以用環保物料親手縫製一隻「大嘥鬼」，為「啡啐啐」嘅大嘥鬼添上新裝。Michelle已急不及待將一隻Ｑ版格仔造型嘅「大嘥鬼」掛在背囊做宣傳。