政情：梁敬國女兒操練變鐵人
唔少家長想仔女出人頭地，不知不覺變成怪獸家長，星期一至日都要仔女學嘢。商務及經濟發展局副局長梁敬國（Godfrey）得一個囡囡，可以話「孻女拉五臟」，依家讀中三，佢話一直都尊重囡囡選擇，好多嘢都係分析完利弊之後，畀佢自己抉擇。佢囡囡除咗學音樂，仲會玩運動，操到變鐵人。
Godfrey話囡囡細個時，希望囡囡學音樂，當中彈鋼琴可以訓練左右腦，兼陶冶性情。但佢囡囡都鍾意動態運動，細細個就帶囡囡去游水，後嚟跟教練學水，仲去參加水陸兩項鐵人比賽，操到直程有肌肉，Godfrey講笑話依家囡囡仲游得快過佢。
囡囡踏入青春期，Godfrey話好彩暫時仲肯黐佢兩公婆，皆因佢每星期總會留番一日做家庭日，行街食飯睇戲行山，唔知咁樣囡囡係咪就肯講出少女心底話呢？