政情：今日你上鏡：陳恒鑌 李靜原來係波友

「乒乓孖寶」之一嘅李靜，打乒乓球叻就唔係新聞，原來佢腳法都唔錯 o架！立法會議員陳恒鑌（Ben）尋日喺facebook上載咗張同李靜嘅合照，原來佢哋係「波友」，但唔係乒乓球，而係足球。阿Ben話之前同李靜同一隊踢過一場波，對方係前鋒，佢係中鋒，李靜原來腳法都好厲害，仲有入波，尋日喺一個乒乓球公開賽撞到佢，梗係問吓幾時再踢番場波喇，而李靜仲送咗塊有親筆簽名嘅乒乓球拍畀佢添！唔多識打乒乓球嘅阿Ben就話留番畀囡囡，希望佢將來識得打啦！