政情：八網難逃：「AV蚊蠓」殺入屯門區會
「AV女」、「AV男」平時聽得多，就連立法會議員何俊仁曾經因開會期間「目及」女而被嘲為「AV仁」，但勢估唔到AV竟然殺入區議會，仲要係蚊同蠓AV喎。
每逢夏天香港都出現蚊患，但今年唔止要滅蚊，仲要滅蠓。早前屯門區議員葉文斌喺facebook（fb）透露，話早幾日區議會會議討論有關殺蚊殺蠓嘅方法，民協區議員楊智恒就提出放置「假蚊」、「假蠓」，誤導啲真蚊同真蠓去嘗試進行繁殖，咁樣就可減少蚊同蠓嘅繁殖量。
葉文斌話自己未聽過呢個方法，同埋覺得楊智恒嘅解說比較複雜，所以就私底下問隔籬位嘅議員，呢個方法叫咩名？點知嗰位議員就答佢「蚊／蠓AV啩？！」葉文斌聽完就明白晒楊智恒嘅意思，仲覺得「蚊／蠓AV」呢個名貼切得嚟又幾好笑，但佢就認為嗰位議員唔會公開講「蚊／蠓AV」個名嘞！
究竟邊位議員講「蚊／蠓AV」嘅呢？葉文斌無透露。據了解，當時坐喺佢左右兩邊嘅分別係新民黨嘅蘇嘉雯同民協嘅甄紹南，就由大家自行判斷喇！