中環出更：余鵬春「貴」遊採購之旅
夏天殺到，唔鍾意香港又濕又熱嘅天氣，去貴州可能係一個唔錯嘅選擇，皆因嗰度夏無酷暑，仲有「天然空調」嘅美譽。喺早前舉行嘅「貴州‧香港旅遊及商貿推介會」中見到裕華國貨董事總經理余鵬春，佢話六月時有可能去貴州採購國貨，如果成行就係佢首次貴州之旅。
雖然余鵬春未去過貴州，但講開貴州特產，佢就朗朗上口，包括有苗族銀飾、刺繡、蠟染、陶瓷等；藥材就有天麻、杜仲、靈芝等，故有「地道藥材」嘅美譽，果然識貨。
轉頭見到菁英會主席盧金榮，佢爸爸盧文端出名鍾意飲茅台，但盧金榮竟然未去過貴州。佢話通常係由姐夫吳永嘉陪爸爸去貴州，以前去開嗰間酒廠單係車程已經要八個鐘，而佢唔鍾意飲茅台，加上唔係咁飲得，所以唔會特登去。
馮英倫難忘考察嘗深水魚
同場嘅發展局政治助理馮英倫就同卓妮分享讀大學時去貴州嘅見聞。佢話大學時曾修讀地理，三年級更隨團去貴州考察地形，當中最奇特係見到名為漩塘嘅漩渦池塘，因為地底有個窿，水向下流時造成漩渦，原理同屋企嘅鋅盤一樣，真係蔚為奇觀。佢當時仲品嘗過從六、七十米深江釣出嚟嘅深水魚，好大條、好彈牙。難得去到貴州，有冇試下當地名產茅台呢？佢笑言當時無乜錢，加上隨團有老師，梗係唔會帶佢哋飲酒喇！
另外，香港青年聯會常務副主席吳傑莊最近喺樓市大有斬獲。佢透露，舊年喺中山買樓，受惠於將興建深中大橋嘅利好消息，短短一年樓價勁升七成半，真係賺到笑。佢又話深圳、廣州、中山等城市吸引唔少人買樓，皆因當地生活節奏較緩慢。至於香港樓市，佢留意到部分港人用超過一半人工供樓，但其實用人工大約四成供樓先係正常，當然前提係人工無下調喇！
卓妮