城市大學發生冧屋頂事件震驚全港，而種滿植被嘅綠化天台更被懷疑係事件嘅元兇。前日一出事，教育局局長吳克儉（吳得掂）就到現場視察，又到醫院探望傷者，尋日更表示會發通告畀全港中小學，檢視綠化天台嘅安全添，反應不知幾迅速！不過，吳得掂就話，中小學推廣綠化校園嘅規模有別大學，好似設立小園圃、種小盆栽，而大學又有院校自主，會自行搵專才處理工程。吳得掂咁講唔通想卸膊將責任推得一乾二淨？抑或為咗事後補鑊，急急通知中小學檢視綠化天台安全呢？
