政情：陳錦泉趁租跌 旺區開舖
早幾年內地客逼爆香港時，旺區大街小巷店舖都被鐘錶珠寶、藥房及化妝品店搶佔，小商店及食肆被迫遠離市區。做食品生意嘅賓仕洋行董事陳錦泉（Andrew）最近就趁租金回跌，進駐銅鑼灣及旺角各開一間日本芝士蛋糕專門店。Andrew坦言，現時租金已較高峰期下跌約四成，所以先夠膽一試。
業務將進駐菲律賓
Andrew近年主攻台灣食品市場，但隨着愈來愈多香港人去台灣玩，台灣零食生意已經唔易做。不過，佢代理嘅台灣茶飲專門店就仍然有好大增長空間，現時喺全港已開十八間，今年仲會繼續擴充分店。此外，佢亦取得呢間茶飲品牌嘅菲律賓代理權，近期會喺當地開兩間分店。
近年日韓風襲港，Andrew亦緊貼潮流變化，開始勤力跑日本市場；至於韓國食品就暫未有行動，事關韓國特色零食品種唔多。睇嚟做生意都要時刻保持敏銳觸覺，冇得躲懶。