政情：太早放洋 李文俊惡補中文
香港人送子女到海外讀書相當普遍，尤其係有錢人家。身兼百仁基金主席嘅理文造紙主席李文俊（Raymond），尋日出席一個留學推介活動時自爆，佢九歲時已經同媽媽一齊到加拿大讀書，結果中文程度唔高，後來學成返港後，自修惡補先至搞得掂。
稱小朋友不宜出國讀書
Raymond有咁「慘痛」嘅體驗，難怪佢認為唔應該送年紀太細嘅小朋友出國讀書。Raymond太太黃敏儀（Money）都好贊成，仲話最好讀完中三先至出去咁話。無去過外國讀書嘅Money話，喺香港讀書好辛苦，外國讀書嘅競爭唔係太大，所以若果有機會，應該去外國讀書兼見識吓世界。主辦推介活動嘅百仁基金副主席李海楓就話，出國讀中學最好係寄宿，因為可以訓練小朋友嘅社交能力、情緒控制及獨立性，亦可以快啲認識新朋友及適應當地文化。