政情：衰到貼地 廢鑊揦番渣沙
人稱「廢鑊」的平等機會委員會（平機會）前主席周一嶽上任後周圍辣火頭，搞到平機會一鑊泡，早前終於被叮走，但依家竟然掉轉槍頭，批評政府官僚主義，直踩前上司無遠見，仲聲言香港有病，但佢做醫生都唔識醫喎，真係跌落地都揦番渣沙。其實廢鑊早在擔任食物及衞生局局長時已經劣迹斑斑，廢名遠播，但政府就盲完一次又一次，竟然有眼無珠再用呢塊舊電池，翻閹畀佢做平機會主席，好啦，現時廢鑊就招招積積大講風涼話，政府真係自作孽！
已成棄將的廢鑊接受電視台訪問講舊時，被問到當年做緊醫院總監時點解無喇喇加入政府，出任食衞局局長。廢鑊就話，佢無預期會做呢項工作，係時任特首董建華搵佢，又話特首出到聲，好難講唔做喎。講到任局長的最大挑戰，廢鑊就話係制度上的限制，又話公營系統都有「bureaucracy（官僚主義）」、「好多上司唔係一個好有所謂遠見嘅人，只係想保持原狀，唔好煩我。」
有口話人無口話自己
其實廢鑊係有口批評人，無口批評自己，自己廢，但就賴香港有病，真係跌落地都揦番渣沙。廢鑊在食衞局已經出名做乜都搞到一鑊泡，仲屢爆醜聞，本報都曾經獨家踢爆佢喺港島加列山道的豪宅違法僭建；○六年內地雞蛋被驗出致癌物蘇丹紅，當時廢鑊公開話有問題雞蛋未傳入香港，點知翌日就隨即道歉，可謂劣評如潮。
上屆政府就話無帶眼識人啫，但今屆政府竟然耳又聾、眼又盲，唔止乜都對着幹，就連公職任命都要再執番廢鑊呢塊舊電池，翻閹畀佢做平機會主席，認真老土兼夾有眼無珠，盲完一次又一次，真係仲衰過老懵董。
掌平機會周圍辣火頭
廢鑊掌管平機會以來周圍辣火頭，搞到平機會內同社會爭議不斷，任內唔止爆出無理解僱、大花筒豪租辦事處、肥上瘦下僭建職位等醜聞，又提出檢討歧視條例，保障內地新移民及個人遊旅客，結果引起社會極大爭議。佢仲以平機會主席身份高調出席撐同志活動，搞到平機會被外界質疑立場偏頗，認真佗衰家。好彩平機會嘅廢鑊時代終於落幕，否則畀佢繼續搞亂檔，後果真係不堪設想。