中環出更：沈豪傑書中自學風俗事
新界幅員廣闊，而且有唔少傳統習俗，例如家庭添丁就會喺祠堂點燈、將花帶掛喺丁燈四周就有「帶子」嘅意思，可惜隨着時代轉變，好多習俗都被遺忘。元朗區議會主席沈豪傑（Wilson）早前喺一個活動上，講開有關新界嘅歷史文化時，就慨嘆坊間有關新界研究嘅書籍唔多，佢幾年前因工作需要而研究新界事務，全憑睇書先了解多咗。
盼本地人多做新界研究
所謂「各處鄉村各處例」，要了解唔同地方嘅風俗文化其實並唔容易，雖然Wilson大部分時間都喺元朗長大，但中間有一段時間去咗英國留學，七年前返新界開律師事務所，坦言最初難於適應。咁後來又點樣熟習呢？佢話因為當時無師傅帶住，惟有搵多啲書睇，久而久之對相關事務嘅認識逐漸增加，無師自通。
講開睇書，雖然佢有興趣研究新界議題，好似丁屋、祖堂等，但相關書籍唔多，搵起上嚟都要花啲時間。佢又認為，有關新界嘅研究應該由本地人做番，因為呢啲嘢始終同傳統有關，如果由外國人做相關研究，點都缺少咗本地氣息喎。
卓妮