中環出更：名人警惕 做善事莫被騙
香港人一向樂善好施，但有時都會遇上騙局。由印度富商夏利里拉家族成員夏大衛（David Harilela）創辦嘅「無名英雄獎」早前舉行頒獎典禮，卓妮同出席名人講起呢個話題，唔少人都有被呃嘅經歷。David話，佢爸爸曾經應邀幫家鄉災後重建，點知得益人竟然係籌募人及親友，David叫停時已造成部分損失，諗起都心噏。
David話，事發喺三十年前，印度有個地方地震導致樓宇倒塌，有人搵佢爸爸幫手建十間大屋畀災民住。David詳查後發現問題多多，包括起屋嘅地係同搵佢幫手嗰班人買嘅，建築又係用嗰班人開嘅公司，最離譜係建成後竟然賣畀佢哋嘅親戚。David馬上叫停計劃，但當中三間屋已經無法挽回，佢就將剩低七間賣出，所得嘅錢再建二十幾間細啲嘅屋畀窮人住。經此一役，David捐錢一定會仔細監察，仲會親自去睇添！
同場仲有和富社企創辦人李宗德、中華總商會常董方文雄及國際扶輪3450地區總監彭志宏夫婦等人，仲有競逐無名英雄獎嘅善長，包括免費派飯畀基層嘅餐廳店主陳灼明（明哥）、扶康會創辦人方叔華神父及國際十字路會創辦人畢馬勤，最終由方叔華奪得獎項。
明哥諗計應對呃飯券
明哥都話試過被道友呃，有人聲稱唔見咗飯券再問佢攞，其實係將飯券賣畀人，然後攞去買毒品。後來明哥諗計派少啲飯券，等道友冇多餘飯券賣，先至令資源用得其所。
卓妮