政情：楊岳橋收陰司紙 ig「貼錢」
公民黨（公文袋）立法會議員楊岳橋早前喺社交網站facebook（fb）自爆收到市民寄嚟嘅帛金，後來佢以寫有其英文縮寫嘅「This AY」糖作回禮。呢啲玩笑似乎愈玩愈大，尋日楊岳橋收到嘅唔再係帛金，而係一疊冥通銀行嘅陰司紙。佢收到之後仲攞住呢疊陰司紙影相，笑言「咁大個仔未見過咁多錢」，又稱百無禁忌，不過晨早流流收到陰司紙認真大吉利是囉！
楊岳橋尋日喺instagram（ig）上載咗一張攞住陰司紙嘅照片，喺fb則貼咗五個寫上「肥仔」、「茂利」、「廢柴」楊岳橋等稱號嘅信封。佢回應查詢時解釋，前者只上載到ig，以免喺星期一嚇親人；後者嚟自該黨嘅支持者，信封內的確裝有捐款，信封面嘅寫法純粹係將上次寄帛金市民嘅格式照辦煮碗。佢又話呢啲「扮帛金」信件，每封大約有數十至百多元嘅捐款，即合共數百元，所有捐款均會撥歸公文袋，並會向立法會作出申報，正如上次嘅十一元帛金咁處理。
不過，楊岳橋收到第一批帛金時，已提醒支持者寄現金係犯法，今次佢再收到現金捐款，似乎支持者唔係咁留心佢嘅提示喎。