政情：公民講場：臨急斬「相思」波叔戴頭盔

早前樹木管理辦事處分析過，逾三成半嘅塌樹意外都同「台灣相思」品種嘅樹木有關。全港廿幾萬棵台灣相思當中，大部分喺五、六十年代種植，開始有「老年危機」。就嚟又到雨季，為免增加塌樹機會，路政署嚟緊推行斜坡植林優化計劃，斬啲老化咗嘅台灣相思樹，再種番啲新品種。之前般含道石牆樹被斬一事鬧到滿城風雨，鬧爆政府冇諮詢，發展局局長陳茂波（波叔）尋日就發表網誌，預先同大家講下個優化計劃。不過今次佢就戴定頭盔，話路政署會諮詢學者、樹木專家同區議會等。梗係喇！見過鬼仲唔怕黑咩！