東區海底隧道專營權八月屆滿，政府就向立法會提交《二○一五年東區海底隧道法例（修訂）條例草案》，等經營權屆滿後接管東隧。立法會議員胡志偉就條例草案提出修正案，即加設日落條款，要求政府要喺指定日期前到立法會檢討東隧收費細節。胡志偉話，如果日落條款獲得通過，就可以迫使政府就東隧收費變成唔係「永恒狀態」，政府要喺一定時間內檢討收費，否則就會失去收費權，佢咁做係希望現有三條過海隧道可以有效分流。不過，運輸及房屋局局長張炳良已講過暫時無意調整隧道費，所以日落條款係咪能夠通過，就要睇吓班建制派點投票喇。