政情：吳文遠赴菲大選趁墟
菲律賓總統選舉日前舉行，社民連主席吳文遠就遠赴菲國考察當地選舉制度，得知當地有人出錢叫選民唔好投票，從而影響選舉結果，同時亦了解學生組織在選舉中嘅角色。佢話，當地投票氣氛好好，市民都好踴躍投票，但佢同時睇到民主唔係萬能，爭取民主之後，要諗下一步點走，否則只係得到民主，難以有具體嘅社會改變。
感到民主非萬能
吳文遠話，佢印象最深刻係菲國會有學生組織喺唔同嘅票站進行監察，以維持選舉公正性，而呢班學生大部分都係法律系學生，令佢從中睇到公民社會選舉中，除咗參選之外都可以有其他形式嘅參與。佢又話，菲律賓選舉以明星效應為主，而且非常民粹，反映到單係民主唔能夠完全解決社會問題，但民主仍然係改變社會嘅第一步。