中環出更：廠商會出巡 考察絲路三國
中華廠商聯合會（廠商會）會長李秀恒（Eddy）早前率團去哈薩克等三個「一帶一路」沿線國家考察，由於呢條路線太冷門，Eddy特別情商康泰旅行社董事長黃士心（Jackie）精心設計行程。Jackie笑笑口話，佢專程派兩名經理實地視察，最後仲同太太一齊做埋團友；佢形容三個國家綠色一片，幸福指數亦好高，個個都玩得好盡興。
Jackie話，佢同Eddy經常一齊去旅行，十分老友，今次Eddy提議去哈薩克、烏茲別克及吉爾吉斯「絲綢之路」考察，佢梗要幫手安排。其實三國名字之後亦會加上「斯坦」二字，解作共和國嘅意思，佢形容三個「斯坦」山明水秀，百姓生活亦唔差，吉爾吉斯官員仲邀請團友行山，齊齊攀上二千幾呎高原。
李秀恒簽協議拓商機
廠商會永遠名譽會長尹德勝、副會長徐炳光、會董吳國安及香港鐘表業總會前主席區宇凡等人都係團友。吳國安話，三國都係共產及回教國家，充滿異國及神秘色彩，佢哋仲睇到新疆天山美景，事關吉爾吉斯位於天山山脈嘅另一邊。雖然眾人玩足八日過晒癮，但Jackie認為呢條旅遊路線暫未成熟，除非係玩遍世界嘅旅行家，否則普羅大眾都係去歐洲玩好過，因為使費差唔多。
不過，Eddy就睇到唔少商機，佢話當地嘅外商以俄羅斯、中國及杜拜為主，港商仍係一片空白，所以今次到訪當地，就趁機與多個城市簽署合作協議，希望可為呢片空白填上顏色。
卓妮