《明報》標榜自己係「知識分子」嘅報紙，根本就是日出西山水倒流──天大怪事，想當年查大俠發表其萬人迷小說，會唔會敲鑼打鼓話自己嘅小說只啱學者教授睇？報紙係大眾讀物，最好深入淺出，個個睇得開心，咁就成功喇！
通曉漢、英、法、日四種語言嘅語言學家周有光，有記者問他如何定義「知識分子」，周老回答：實際上，「知識分子」是沒有定義的，因為知識沒有定義。以前人們認為，只有人才有知識，動物沒有知識。現在發現，這個說法不準確。因為現代科學研究證明，動物也有知識，黑猩猩的知識就很高。所以，「知識分子」這個名稱根本沒有定義，也很難給「知識分子」下一個定義。更不知道甚麼叫真的知識分子，甚麼叫假的知識分子。
由此可見，甚麼「知識分子」嘅報紙完全是假命題，自欺欺人也。
報界人才輩出，有沒有「不可替代嘅靈魂」？喺呢行打滾四十年嘅老朽對此有所保留，皆因叻人見得太多，自己當一粒螺絲釘足矣。呢幾句話絕對係肺腑之言，邊個年輕時唔係豪氣干雲，要與有肝膽嘅人共事啊，但到頭來發覺叻人不一定找到舞台。呢，孔子夠叻叻豬喇，是一個集才華與人品於一身嘅偉人，論才藝，禮樂射御書數，無一不精；講品德，溫良恭儉讓，超凡入聖；之不過，佢帶着一班學生周遊列國，希望找個機會實行佢嘅政治主張，卻曾落得如喪家之犬，沒有國君用他，結果只好返回魯國春風化雨，難道佢又可以狂呼被粗暴打壓咩？
時也命也，各有前因，何勞他人說三道四。孔子死後亦大起大跌，西漢武帝獨尊儒學時被捧上天，文革時無端與林彪綑綁在一起被批，聲譽斷崖式下墜，真是無妄之災，可見叻人是否有用武之地，還得看造化，再多的鬧劇只會得啖笑。