政情：八網難逃：建制三子餐餐吔麵抗拉布
立法會上周三開始審議財政預算案嘅撥款條例草案，激進泛民主派一如以往瘋狂拉布，不停要求點算開會法定人數，被迫坐定定嘅建制派議員惟有自創「抗拉布」新招，其中梁志祥就搵埋黨友陳克勤同鍾樹根，拍攝「無厘頭」捱公仔麵短片，向市民簡述佢哋因為泛民拉布，一餐分幾餐食嘅苦況。
短片中見到梁志祥、陳克勤同鍾樹根喺立法會咖啡室食午餐，一人一碗公仔麵，仲有罐頭豆豉鯪魚及沙甸魚。梁志祥話，因為拉布議員成日點算人數，佢哋惟有餐餐留喺立法會食公仔麵，以便點人數時盡快跑回會議廳。不過，餐餐公仔麵好寡，所以佢同陳克勤就各自拎咗私伙罐頭加餸，仲吸引咗鍾樹根黐餐添。
跟風拍片放上網
梁志祥話希望更貼近新科技，所以請咗個新助理，仲花萬多元買咗啲攝錄器材，拍攝吓日常生活畀大家睇。佢又話，起初見黨友蔣麗芸拍片上網，於是有樣學樣，仲話之後會同鍾樹根有新搞作，叫大家留意佢facebook專頁喎。