中文大學校長沈祖堯發表公開信，話中大校董會稍後將按原定計劃開展下任校長嘅遴選工作。沈祖堯話，佢出任中大校長至今近六年，早前已向校董會明確表示，渴望可以重返醫學院內科及藥物治療學系，全職擔任教學和研究工作，校方同意佢續任一個較短年期至一八年六月三十日，並決議於今年年中開展遴選下任校長嘅工作。
沈祖堯期望在卸任校長後，可以到海外進行一段時間嘅講學及進修，然後再展開科研及治療病人方面嘅計劃，特別係癌症研究工作。佢亦一再強調對參政不感興趣，只想繼續從事醫療、科研和教育工作。
沈祖堯又提到，早前梁乃鵬獲校董會提名為下任校董會主席，而大學監督亦接納提名，佢對此深感欣喜，深信憑藉梁乃鵬嘅豐富經驗和廣闊人脈、對高等教育嘅認識同熱誠，必能勝任此職，並當會帶領中大更上一層樓。佢會一如以往和校董會主席、整個校董會及大學團隊，全力協作，推動中大持續發展。