中環出更：肥亨演講籌款 愛女佗B撐場
香港嶺南大學日前舉行籌款晚宴，邀請港鐵主席馬時亨（肥亨）擔任演講嘉賓，卓妮見到佢大女馬露明（Christine）腹大便便都現身撐場，數數手指仲有個幾月小朋友就會出世喇，Christine笑言丈夫劉仲恒仲緊張過佢，啲嬰兒用品亦都大致準備好晒喇！Christine同身兼嶺大校董及百仁基金副主席嘅羅詠詩（Anthea）非常好傾，原來係請教緊Anthea生完寶寶後嘅修身之道。
兩子之母 羅詠詩身形fit爆
Anthea已經有兩個十幾歲囝囝，但身形依然fit爆。對此Anthea就話無特別做運動，反而對美容更有研究，好似近期佢就買咗部遠紅外線童顏儀，仲被丈夫黎藉冠笑佢喺屋企好似戴住《星球大戰》啲道具喎！談到最近市道差咗，或會影響大學籌款工作，Anthea就話慶幸近期比較多人關注青年問題，所以教育方面嘅籌款工作，相對其他機構都係穩定啲，籌錢同以往相若。
校董會主席歐陽伯權就話，唔會將籌款責任交畀學生，唔希望籌款壓力會轉嫁到學生甚至學生家長身上，學生淨係參與吓表演都已經足夠。同場仲有基督教正生書院校長陳兆焯、香港培正中學校長譚日旭同榮源茶行銷售及市場推廣經理王詩雅等。陳兆焯透露，正生書院將於十一月有籌款活動，希望多啲人支持佢哋嘅教育工作。
卓妮