中環出更：網購成風 進出口業冇有怕
近年網購愈趨普遍，有唔少代購網仲幫顧客喺海外入貨寄返香港。香港中華出入口商會（中出）前日為第三屆「進出口企業大獎」舉行記者會，卓妮見到經營糧油生意嘅會董李豐年，講起網購及代購會否影響出入口商嘅生意時，佢就話多數代購網都係賣特別及市面上較難搵到嘅貨品，而且數量唔多，所以對出入口商衝擊唔大。
李豐年解釋，代購網站同消費者直接對口，繞過出入口公司，但由於數量唔多故影響相對較細。雖然一般網購漸成主流，但大部分網店售賣嘅貨品都係要經批發商或代理攞貨，所以只係慳番實體商店舖租，對進出口商來講只係客戶種類唔同咗啫。
甘亮明買奶粉信實體店
至於做資訊科技嘅成員楊文銳就係網購常客，佢話多年前試過上網買演唱會飛，畀咗錢後賣家先話得番平價飛，但佢都照殺。佢話依家網購好方便，仲多咗外國產品想打進內地市場，例如奶粉就係其中之一。
不過，四個多月前生咗個小朋友嘅會董成于思，同有個三歲兒子嘅成員甘亮明就甚少於網上購買奶粉等嬰兒用品，甘亮明話上網買貴貨難分真假，購買後如有問題又較難追究，故仍光顧實體店較多。
同場仲有中出會長張學修、榮譽會長莊成鑫、副會長陳勁、常董彭楚夫及陳建年、商務及經濟發展局常秘容偉雄等。張學修話，今屆獎項已開始提名，過往唔少得獎者均是市民熟悉的公司，評審工作亦分兩天進行，可算相當認真。
卓妮