政情：八網難逃：外遊限制 謝偉俊捐血變混吉
血庫告急，觀塘區議員柯創盛（柯仔）喺社交網站fb 呼籲市民踴躍捐血，仲聯同區內班兄弟昨日齊齊去捐血添！立法會九龍東議員謝偉俊（Paul）亦響應網上號召，特登走去觀塘捐血站，點知被拒捐血，今次真係混吉嘞！
靠舉牌呼籲捐血
阿Paul喺fb話，本來都想挽起袖子貢獻心力，但捐血中心嘅醫護人員對佢講，因為佢啱啱喺美國回港，依然喺限制期間內，唔能夠捐血。眼見在場數十人齊齊捐血，而阿Paul自己就有血捐不得，無事可做，佢惟有同在場嘅柯仔，攞起紙牌呼籲市民捐血。
對於今次捐血不成，佢都感到可惜，仲話只能夠等限制期二十八日後再去捐血嘞！雖然佢有啲失落，但喺佢嘅混吉事件上載fb之後，好多人即時回應話會去捐血，咁都算係收到喇！