政情：黃麗嫦保留實力 睇好後市
喺經濟寒冬效應下，包括鐘錶珠寶同食品等多間連鎖零售店，陸續傳出關閉分店嘅消息，似乎預示業界仲有排捱。香港鐘表業總會主席黃麗嫦（Esther）就認為，業界收縮店舖規模可將營運成本降低，以保留實力等待經濟復甦，反而係好事。佢仲話對後市唔使睇得咁灰，認為最壞時間已經過去，下半年市道有望好轉。
腕錶緊貼潮流獲好評
Esther話好多業界都反映近排市道穩定咗，經濟下滑同內地遊客減少已經係事實，但唔會無止境係咁跌。佢話呢段時間業界應該要分散投資，例如開拓新市場同引入唔同品牌等，進行市場區隔。本身做品牌授權生產腕錶生意嘅佢話，最近就研究緊進軍全球人口第二大嘅印度市場，仲緊貼潮流變化，將佢代理嘅一款運動型名車品牌腕錶大變身，行簡約設計風格，結果喺瑞士巴塞爾鐘錶展大受歡迎添！