未入正題前，先問大家一個常識題。如果病人身上同時長有惡性腫瘤及雞眼，醫生應該切除邊樣先？冇錯嘞，梗係切除惡性腫瘤先喇，事關雞眼唔會攞命，但惡性腫瘤就唔同講法，遲咗做手術隨時連命都冇o架，呢啲咪叫事有緩急輕重囉。
咁簡單嘅道理，三歲細路仔都識，偏偏香港警察唔識，你話係咪奇哉怪也？係咁嘅，元朗近年成為人蛇搶灘同居住嘅熱點，佢哋膽正命平，無惡不作，搞到元朗烏煙瘴氣，雞犬不寧。好似早兩日吖，南亞兵團四小時內兩劫途人財物，女街坊被搶去數萬元名牌手袋，男途人慘被玻璃樽扑頭，差啲命都冇。咁仲唔止，佢哋連單車都唔放過，當街當巷照搶可也，事敗後仲發惡踢傷阿SIR添，問你怕未。
即係咁，家陣嘅元朗就好似惡貫滿盈嘅「葛咸城」，假難民無法無天，居民生活喺水深火熱之中，警方再唔出手打擊，遲早搞出人命都似。
等完又等，盼完又盼，警方近日終於採取大規模掃蕩行動，不過咪拍手住，打擊對象唔係假難民，而係賣淫集團咋。大家冇聽錯，元朗警區兩個月前開始部署掃黃，日前收網搗破一個由夫妻檔操控嘅一條龍式賣淫集團，拘捕逾三百人，都咪話唔大陣仗。
冇錯，賣淫觸犯法例，掃黃冇人話唔啱，之但係，眾所周知元朗最大治安毒瘤唔係黃業，而係假難民。流鶯滋擾社區係討厭，但點都好，冇可能危險得過兇神惡煞嘅假難民啩？正如有人話齋，假難民先至係心腹大患，而黃業不過係癬疥之疾啫，假難民問題一日不除，元朗居民都冇好日子過。警方不分輕重，好做唔做，元朗居民想唔組織自衞隊保命都唔得喇。
講到呢度，肯定好多人會感到迷惑不解，當局對黃業零容忍，點解對假難民問題卻容忍有加、慈悲為懷呢？唔通有人同假難民有親？定係同引入假難民嘅幕後集團打龍通？唔係無的放矢o架，東方報業集團一早踢爆本地黑幫和勝和前坐館「上海仔」郭永鴻係「南亞人蛇之父」，巴裔「兵頭」旗下嘅「老虎仔」仲喺早前嘅內地公安打擊人蛇行動中落網添。香港警方唔管麻鷹管雞仔，如果話當中唔涉及有人包庇，講都冇人信咯。
一句到尾，對假難民仁慈，即係對市民殘忍。莫講話一般市民已經忍無可忍，連土生土長嘅南亞裔人士亦不勝其擾，紛紛支持香港重設難民營甚至退出聯合國《禁止酷刑公約》，當局仲等乜嘢吖？講真，如果當局一早將掃黃嘅決心同精力處理人蛇問題，香港今日點會淪為「難民港」吖？