主張以武制暴嘅本土民主前線（本民前）於旺角新春暴亂一役聲名大噪，曾任本民前臨時發言人嘅衛碧君（Amber）亦成為網民焦點，Amber昨疑因壓力宣布退出本民前，還記得香港眾志副秘書長周庭當年辭去學民思潮發言人，未有參與學民事務，轉眼間已加入新政黨成為其中一員，莫非Amber想做周庭翻版，風頭過後隨時「復出」？
衛碧君嘅facebook尋日一度出現個人退出本民前貼文，惟不久後即被刪去。本民前發言人黃台仰接受查詢時承認，Amber透過Telegram嘅手機通訊程式知會退出本民前嘅決定，黃稱尊重對方嘅決定，不作挽留，又估計Amber係因為需要專心應付文憑試，而作暫時退出決定。
據悉年僅十七歲嘅Amber自成為臨時發言人後，旋即成為眾人焦點，不但被傳媒追訪，更於不同網上討論區被熱議，據知Amber感到一定壓力因此決定求去，未來會改以義工身份現身。本報記者曾致電衛碧君查詢暫未獲回覆。