民主黨尋晚初步敲定九月立法會嘅出選名單。據了解，副主席尹兆堅將會出戰新界西選區，原本同佢爭嘅元朗區議員鄺俊宇最後中途退出，同現任議員涂謹申以兩張名單出戰超級區議員。
至於尹兆堅嘅對手陳樹英（阿Tree），早前亦曾經參選立法會，但最終落敗。阿Tree喺早前區議會選舉已經輸咗議席，原打算靠出戰立法會「翻盤」做議員，但依家連出線權都冇埋，可謂立法會夢碎。
至於新界東方面，最後由總幹事林卓廷獲得出線權。但其實事情並唔係想像中咁順利，據知林卓廷喺內部民調其實係輸咗畀黨齡只有兩年嘅變性人梁詠恩（Joanne），但最後林卓廷喺支部同埋區議員評分方面高過Joanne，成功獲得出線權。有「區選黑仔王」之稱嘅莊榮輝，則喺港島區不敵許智峯。兩位現任立法會議員黃碧雲、胡志偉就繼續喺九龍西同埋九龍東競逐連任。據知民主黨會由中委會確認出選名單後，再喺二十四號嘅黨大會上再決定通過與否。