政情：李慧琼憶述「工廠妹」生活
好多學生哥都會搵暑期工，賺下使費同攞啲工作經驗咁，雖然李慧琼（Starry）依家係會計師兼立法會議員，原來佢細個做過工廠妹。
Starry話讀中學嘅時候同啲同學仔一齊去咗印刷廠，印啲襟章，嗰次係佢第一次做嘢，覺得幾好玩，不過人工就真係唔高嘞，成份糧買下嘢、請媽咪、爸爸食嘢，都已經好快用完。到大學嘅時候讀會計，就想了解多啲工作係點，於是去咗會計師樓做實習，但佢就冇去大行，因為大行競爭都幾大，佢就揀咗較細規模嘅會計師樓，覺得細間有細間好，學得比較全面，暑期工嘅工作都比較簡單，又真係唔覺得辛苦喎。
蔣麗芸請人 注重有發揮
講起暑期工，Starry嘅黨友蔣麗芸（Ann）就話自己依家請暑期工，最注重係畀到年輕人有發揮嘅機會，曾經試過請佢哋幫自己處理網上宣傳，年輕人比較貼近網絡，幫到手之餘，又可以發揮所長，大家都開心咁話。