政情：波叔出口術 似鋪路加水費

網誌噏大堆水資源計劃

波叔喺網誌講咗一大堆計劃，首先係荃灣、荔枝角同港島西等雨水排放隧道成效唔大，跟住話要進一步擴大香港集水區嘅可行性唔大。政府亦計劃喺合適嘅新工務工程項目，加入設施以重用洗盥水同集蓄雨水作非飲用用途，最後講到正計劃喺新界東北部地區，利用石湖墟污水處理廠嘅排放水，進一步處理成為再造水嘅情況。

睇嚟佢似係想話畀大家知，對水資源問題幾咁上心，但轉頭就撩交嗌。佢提到近年社會探討呢個課題時，有時會滲入一啲不必要嘅政治觀點，既無助客觀探討技術可行性、成本效益以至各方面利弊，更唔會為社會所面對嘅政治爭拗帶嚟可行出路。佢希望大家能以實事求是嘅態度，探討香港水資源管理策略，以訂出最切合香港實際情況嘅供水來源組合同比例。

議員反對建設費轉嫁市民

立法會議員黃碧雲就認為波叔所指嘅「不必要政治觀點」，或者係社會有聲音覺得唔應該靠內地而買咁多東江水，所以要去增加本地水資源。佢話曾隨團訪問新加坡，考察當地海水化淡廠同水資源管理策略，認為開發海水化淡會較貴，因為要用電，長期係需要建設，但加唔加水費係財政問題，自己就唔多贊成大幅加水費，將建設費用轉嫁市民。

拗還拗，事實係水務署之前已用咗近二千萬元購買化驗儀器同增聘人手，燒咗咁多錢，發展自身供水水源工程費好大機會咪又係市民埋單，而喺鉛水事件過咗九個月後，竟然提出呢個問題，又難免令人質疑波叔想趁件事丟淡，鋪路加水費喎。