中環出更：肥亨靠朋友促成神級演奏
港鐵香港站尋日樂韻飄揚！曾奪得格林美獎嘅著名美國小提琴家約夏‧貝爾（Joshua Bell），尋日下晝喺香港站表演兩首首本名曲。卓妮見到港鐵新任主席馬時亨（肥亨）都在場，仲變咗小粉絲添！能夠促成今次演出，肥亨笑言「最緊要朋友多」，事緣佢上任後同友人談及，希望推廣文化藝術表演，友人原來認識貝爾，經朋友搭路下邀得佢義務表演。
貝爾成名之作，係喺二○○七年喺美國華盛頓地鐵朗方廣場站入口扮作街頭藝人演奏，期間只有一名途人認出佢，及後有人將貝爾嘅演奏片段上載YouTube，先令人恍然大悟。佢七年之後，即係二○一四年，重返華盛頓地鐵聯合車站演出，當時就有數千人圍觀，冇走寶。佢曾經喺三任美國總統同中國前領導人前演出。
彭耀佳志在撐太太
貝爾聯同意大利鋼琴家阿萊西奧‧巴斯（Alessio Bax）尋晚喺文化中心演出，而下晝就先喺港鐵香港站中環行人隧道演奏，算係送畀香港市民嘅見面禮。佢哋一同演奏兩首名曲，高峰期有二百至三百人駐足圍觀，都真係好熱鬧o架！
肥亨同太太馬王培琪同市民一樣企喺旁邊欣賞，一齊拍手，其中肥亨仲化身小粉絲，不停用手機影低表演添！肥亨形容貝爾有「神級風範」，至於點樣促成今次演出，佢就笑言「最緊要朋友多」。
呢啲藝術演出係咪可以推廣至其他站，肥亨坦言要「過五關斬六將」，除咗香港站部分用地一早已向政府申請作為表演場地，其他站要向多個政府部門申請。
喺人群中仲見到香港總商會主席彭耀佳，之不過佢「醉翁之意不在酒」，話係嚟捧任職港鐵商務總監嘅太太楊美珍場喎！
卓妮